Министерството за финансии постигна значителен напредок во имплементацијата на Реформската агенда 2024–2027, со фокус на транспарентност, отчетност и подобрено управување со јавните финансии. Реформите се оценети како клучни за зајакнување на капацитетите на државата за ефикасно користење и управување со средства од Европската Унија.
Од Министерството информираат дека се исполнети осум чекори од вкупно 22, што резултираше со одобрување на 142,1 милион евра во рамки на Реформската агенда.
На работен брифинг со амбасадорите на земјите членки на ЕУ, министерката за финансии Гордана Димитриеска-Кочоска истакна дека Инструментот за реформи и раст е клучен за зајакнување на институциите, подобро управување и забрзување на европскиот пат на државата.
Во рамки на реформите е постигнат напредок во јавната внатрешна финансиска контрола, јавните набавки и управувањето со јавните инвестиции, вклучително и усогласување со ЕУ стандарди и зголемена транспарентност.
Исто така, донесени се сите 17 подзаконски акти од Законот за буџети, воспоставен е регистар на јавни субјекти, а бројот на примарни буџетски корисници е намален од 85 на 35.
Министерството за финансии најавува продолжување на реформите, со фокус на поддршка на мали и средни претпријатија, подобрување на деловното опкружување и поефикасно користење на европските фондови.