Четириесет и седумгодишна жена од Бар е уапсена под сомнение за разбојништво, откако на крајно необичен и агресивен начин се обидела да измами и ограби продавница. Осомничената Џ.Х. влегла во објектот маскирана со перика, обидувајќи се да плати цигари со фалсификувана банкнота од 50 евра.
Драмата започнала кога вработената ја открила измамата, по што жената извадила скалпел и почнала да замавнува кон неа.
„Со намера да ги задржи украдените предмети и кусурот, таа мавтала со сечилото кон вработената, при што оштетила дел од нејзината облека“, соопштија од полицијата во Бар.
Полицијата брзо ја лоцирала осомничената во населбата Бјелиши, каде кај неа биле пронајдени периката, готови пари и фалсификувани банкноти кои биле отпечатени само на едната страна.