Претседателот на СДСМ, Венко Филипче, на денешната прес-конференција упати обвинувања до премиерот Христијан Мицкоски за намерно неспроведување на реформската агенда и кочење на европската перспектива на државата.
Поводите за оваа реакција, според опозицискиот лидер, доаѓаат по истекот на рокот, 1 јуни, кој бил поставен за усвојување на дел од клучните закони во Собранието.
Според податоците што ги изнесе Филипче, од предвидените 16 закони кои требало да бидат донесени до јуни 2025 година, усвоени биле само шест, додека од десетте закони за кои бил продолжен рокот до јуни 2026 година, донесени се само два.
„Реализацијата е само 20 проценти, што покажува дека Владата нема ниту капацитет ниту волја да ги спроведе реформите“, изјави Филипче.
Тој посочи дека и дел од законите што Владата ги смета за реализирани не се усогласени со европските стандарди, апострофирајќи ги Законот за електронски комуникации и Законот за Судски совет.
„Законот за Судски совет не е донесен согласно препораките на оценската мисија, туку претставува манипулација со која се обидуваат да ја доведат во заблуда Европската Унија“, истакна Филипче.
Опозицијата нотира дека постои и дополнителна листа од 33 закони кои сè уште не се донесени, а се клучни за агендата и треба да бидат усвоени до крајот на 2026 година, додека истовремено се доцни и со актите во енергетиката и финансиската транспарентност.
Филипче направи споредба со регионот, потенцирајќи дека Црна Гора и Албанија веќе ги затвораат преговарачките поглавја, додека реформите во земјава стагнираат, по што упати јавен повик до Владата за распишување референдум.
„На крај памет не ви паѓа како живеат граѓаните тука во државата. Распишете референдум и час поскоро продолжете го европскиот пат затоа што немате право никакво ни политичко ни морално ова да и го правите на Македонија и на генерациите коишто со години чекаат да се случи европската приказна. Посебно на новите и младите генерации кои ако не го направите чекорот којшто не е никаков ризик нашиот идентитет и јазик едноставно тука ќе се иселуваат во се поголем број“, порача Филипче.
На крајот, претседателот на СДСМ предупреди дека понатамошното одложување на обврските ќе резултира со масовно иселување на младите луѓе и неповратно губење на шансите за европска иднина.