Претседателот на СДСМ, Венко Филипче, по повод годишнината од смртта на Гоце Делчев, упати остри критики до актуелната власт, обвинувајќи ја за злоупотреба на името на великанот за партиски и коруптивни цели.
Филипче истакна дека постои длабок јаз меѓу идеалите на револуционерот и денешното дејствување на ВМРО-ДПМНЕ.
„Гоце Делчев се бореше против неправда и туѓинска власт. Денешното ВМРО се бори за тендери, заштита на криминалци и за бугарски пасоши во џебовите“, изјави Филипче.
Според лидерот на опозицијата, доколку Делчев беше жив денес, тој би се срамел од политиките на Христијан Мицкоски и би се спротивставил на начинот на кој се води државата. Филипче тврди дека ВМРО ја претворило Македонија во плен, а граѓаните во заложници на корупцијата.
„Ако Гоце Делчев денес беше жив, би се срамел од оние што се повикуваат на неговото име додека уништуваат сè за што тој се бореше. Тој лично би се борел против Мицкоски, против оваа денешна криминална група ВМРО и сè она што тие го претставуваат“, нагласи претседателот на СДСМ.
Филипче заклучи дека СДСМ продолжува со борбата за демократска и европска Македонија, најавувајќи дека наскоро ќе дојде време на правда и одговорност.