Популарната социјална мрежа Фејсбук во моментов се соочува со сериозни технички потешкотии кои го оневозможуваат нејзиното нормално функционирање на глобално ниво. Голем број корисници ширум светот алармираат дека воопшто немаат пристап до десктоп-верзијата на оваа платформа, а според нивните тврдења, сериозни пречки и кочења се забележуваат и кај мобилната апликација.
Проблемот веќе е детектиран и на специјализираните платформи за следење на состојбата на интернет мрежите. Таму во изминативе неколку минути нагло се проширија илјадници пријави од засегнати граѓани од повеќе земји, кои не успеваат да ги отворат своите профили.
Како што посочуваат корисниците, при секој обид за најава на мрежата, системот автоматски им испишува официјално соопштение во кое се вели дека се работи за дефект на самата страница кој набрзо би требало да биде саниран.
Еве ја точната порака која им се појавува на корисниците на нивните екрани:
„Профилот е привремено недостапен. Вашиот профил моментално не е достапен поради PROBLEM со страницата. Очекуваме проблемот наскоро да биде решен. Обидете се повторно за неколку минути.“
Техничкиот колапс на мрежата на Мета е регистриран рано наутро, по што следеше бран поплаки на останатите социјални мрежи каде корисниците масовно споделуваат за падот на платформата.
Според веб-страницата „Доундетектор“, проблемот е регистриран околу 9 часот, по што брзо се прошириле пријави од корисници од повеќе земји низ светот. Последен пат Фејсбук имаше сличен глобален прекин на 12 јуни, кога платформата не функционираше на ниту еден уред.