Екипите на „Електродистрибуција“, во координирана акција со СВР Тетово, открија нелегално користење на електрична енергија во деловен комплекс лоциран на Попова Шапка.
Како што информираат од компанијата, при увид е констатирано „противправно користење на електрична енергија преку кабловски разводен ормар. Директно неовластено приклучување со нисконапонски кабел (4×16 mm2)“.
За овој случај е составен соодветен записник, а поради сериозноста на прекршокот, поднесена е пријава до МВР според член 235-а од Кривичниот законик. Покрај правните последици, пресметана е и фактура за надомест на штета која изнесува 1.361.599,00 денари.
„Електродистрибуција“ продолжува со интензивни теренски контроли со цел сузбивање на ваквите појави и заштита на електроенергетскиот систем, при што најавуваат строги санкции за секој што неовластено презема електрична енергија.