Светски познатиот музеј Лувр во Париз денеска беше принуден да ги затвори вратите за посетителите откако демонстранти ги блокираа сите влезови во објектот. Блокадата е дел од бранот протести што ја зафатија Франција поради високите трошоци за живот и состојбите во образованието.
Од раководството на музејот, каде што се изложени уметнички ремек-дела како „Мона Лиза“ и „Венера де Мило“, преку платформата X потврдија дека објектот е затворен поради студентски протести, без да наведат кога повторно ќе биде отворен за јавноста.
Блокадата пред музејот ја предводеа студентите од „Училиштето Лувр“, специјализирана институција за историја на уметност, археологија, антропологија и музеологија. Тие излегоа во поддршка на средношколците и за да ја осудат, како што рекоа, полициската репресија, објавија француските медиуми.
Лувр важи за најпосетуван музеј во светот, со околу девет милиони посетители годишно.
Одлуката за затворање доаѓа по викендот исполнет со демонстрации кои во повеќе француски градови ескалираа во судири, насилство и грабежи.
Бранот масовни протести во Франција започна во средината на септември како локален штрајк на учениците и наставниците во средно училиште во сиромашно предградие на Париз, поради лошите услови за работа, недостигот на кадар, преполните училници и дотраените згради.
Оттогаш, незадоволството се прошири низ сите средни училишта и универзитети во земјата, со блокирање на сообраќајниците и конфликти со полицијата.
На студентските и ученичките собири подоцна им се приклучија синдикатите, родителите и активистите од движењето „Жолти елеци“, со што барањата се проширија и против владините мерки за штедење и поскапувањето на горивата.