Експерти со докажано искуство, а не ПР-кампањџии ќе го подготвуваат Планот за управување со квалитетот на воздухот во Скопје, најави советничката група на ВМРО-ДПМНЕ и коалицијата. Тие преку социјалните мрежи порачаа дека новите мерки ќе бидат мерливи, а парите на граѓаните веќе нема да се трошат на проекти со сомнителен квалитет подготвувани од аматери.
Реакцијата доаѓа откако Скопје со денови е на врвот по загаденост, а СДСМ побара прогласување на кризна состојба.
Од советничката група на ВМРО-ДПМНЕ се децидни дека борбата со аерозагадувањето е долготраен процес кој не се решава со ад-хок акции.
„Мерките од овој план ќе бидат поддржани од градските власти и ќе се бара мерливост на резултатите и отчетност во реализацијата. За дел од мерките ќе бараме помош при финансирањето, а дел од мерките од овој план ќе се финансираат од пари на граѓаните и тие не смее веќе да се трошат како досега, во проекти со сомнителен квалитет, без мерливи резултати и подготвувани од аматери“, пишуваат советниците.