Поранешната претседателка на Државната комисија за спречување на корупцијата (ДКСК), Татјана Димитровска, денеска во судницата категорично ги отфрли обвинувањата за одавање службена тајна и компјутерски фалсификат.
„Ја разбирам содржината, не го признавам делото и не се чувствувам виновна. Сметам дека не сум сторила ништо за што сум обвинета“, изјави Димитровска пред судот, додавајќи дека моментно е вработена во Државниот завод за ревизија (ДЗР) како помошник на државниот главен ревизор.
Димитровска се товари дека му одала службена тајна на поранешниот директор на ТЕЦ „Неготино“, Небојша Стојановиќ (обвинет во предметот „Адитив“), како и за компјутерски фалсификат, бидејќи, според обвинението, ревизорот Миле Столевски во нејзино име го полагал тестот за добивање безбедносен сертификат. Покрај неа, на обвинителната клупа седнаа и Столевски, како и Билјана Петровска-Мантева од ТЕЦ „Неготино“, која исто така се товари за одавање тајни. И двајцата изјавија дека не се чувствуваат виновни.
Адвокатот на Димитровска, Владимир Туфегџиќ, уште на почетокот побара Јавното обвинителство да го повлече обвинението. Според одбраната, информациите за кои се товари екс-претседателката биле елаборирани на јавни седници на ДКСК кои се пренесувале во живо.
„Ниеден документ кој бил предмет на расправа на јавна седница немал класификација службена тајна. Што се однесува до сертификатот, клучни се безбедносните проверки на АНБ, а не самиот тест“, потенцираше Туфегџиќ, најавувајќи сведоци од АНБ и ДКСК.
На ова реагираше јавната обвинителка Наташа Поп Трајкова, која побара судот да не дозволи коментари од одбраната пред изведувањето на доказите од Обвинителството. Таа нагласи дека Обвинителството располага со цврсти материјални докази, вклучително и анализа на податоци од мобилниот телефон на Димитровска со речиси 250.000 електронски записи.
Судењето продолжи со читање на потврдите за одземени предмети при претресите, а следното рочиште е закажано за 16 април 2026 година.