Позитивен сигнал за семејните буџети пристигна со најновите податоци за јуни, кои покажуваат благо ладење на ценовниот притисок во државата. Намалувањето на трошоците конечно се забележува кај храната и транспортот, кои со месеци ја диктираа скапотијата.
- „Најновите податоци на Државниот завод за статистика покажуваат дека во јуни 2026 година е забележана дефлација од 0,5% на месечно ниво, што претставува позитивен сигнал за стабилизирање на цените и намалување на трошоците за живот на граѓаните. Особено е значајно што намалување на цените е регистрирано токму кај две категории кои имаат најголемо влијание врз семејните буџети – храната и безалкохолните пијалаци, каде трошоците се намалени за 1,1%, како и транспортот, каде е евидентиран пад од 1,6%“, се вели во ставот на Министерството за економија и труд.
Сепак, владината анализа на податоците од Државниот пазарен инспекторат открива сериозен јаз во начинот на кој се формираат цените во маркетите. Имено, во изминатата година од мај до мај, набавните цени на храната и производите за бебиња пораснале за 2,66%, но продажните цени во продавниците скокнале за двојно повеќе – односно за 4,56%.
Ова значи дека дел од поскапувањето не се должи на реални економски трошоци, туку на фактот што трговците си ги напумпали бруто профитните маржи за скоро два процентни поени.
- „Податоците укажуваат дека дел од растот на малопродажните цени не се должи само на повисоките набавни цени, туку и на зголемувањето на бруто профитните маржи. Анализата покажува дека во одредени случаи, и покрај намалувањето на набавните цени, не доаѓа до соодветно намалување на продажните цени, што резултира со повисоки маржи. Воедно, првичната анализа покажува и благо намалување на просечната бруто профитна маржа во периодот мај–јуни 2026 година за 0,18%, што претставува позитивен сигнал за постепена стабилизација на цените“, додаваат од ресорното министерство.
Како реакција на ваквите пазарни аномалии, државните инспектори и понатаму ќе продолжат со редовно следење на движењето на цените и профитните маржи со цел навремено да се реагира доколку се утврдат нови нарушувања на пазарот и неоправдани поскапувања.