Општина Центар објави јавен повик за финансиска поддршка на здруженија – даватели на социјални услуги, со цел да се обезбедат нови сервиси и поддршка за ранливите категории граѓани. Со повикот се поддржуваат програми што промовираат инклузија, заштита на менталното здравје и превенција кај младата популација.
Средствата се наменети за индивидуализирани услуги со асистивна технологија за деца, млади и лица со различни попречености, вклучително и аутизам, преку обезбедување пристап до компјутер и интернет. Дополнително, се поддржува превенција и психо-социјална, психотерапевтска и психијатриска поддршка за млади во ризик од злоупотреба на дроги и нивните семејства, како и процеси на ресоцијализација.
Повикот вклучува и Центар за ментално здравје кај деца со обезбедена психо-социјална и дефектолошка поддршка, како и активности за зелена социјална работа, со воведување на еколошка перспектива и градење инклузивна и зелена средина.
Градоначалникот Горан Герасимовски истакна дека овие програми се со силен фокус на инклузијата и еднакви можности за сите.
- „Општина Центар обезбедува социјална заштита за ранливите категории и создава стимулативни услови за развој на младите. Преку ваквите програми даваме поддршка и помош таму каде што е најпотребна“, нагласи Герасимовски.
Рокот за поднесување на пријавите е 10 дена од објавувањето на општинската веб-страница.