Општина Илинден објави јавен повик за доделување субвенции за набавка на инвертер клима уреди или соларни панели, како дел од мерките за унапредување на енергетската ефикасност и заштита на животната средина.
Со овој јавен повик се предвидува кофинансирање во висина од 50 проценти од вредноста на набавениот уред или панел, односно најмногу до 10.000 денари по производ.
Градоначалникот на Општина Илинден, Александар Георгиевски, посочи дека мерката има за цел да го поттикне користењето на енергетски ефикасни и еколошки прифатливи решенија во домаќинствата, со што директно се придонесува за намалување на загадувањето и подобрување на квалитетот на живот.
Според условите, право на учество имаат сите граѓани со постојано живеалиште на територијата на општината кои ќе набават инвертер клима или соларен панел почнувајќи од 18 мај 2026 година.
Повикот ќе биде отворен сè до исцрпување на предвидените финансиски средства, при што оваа субвенција може да се искористи само еднаш по едно семејство.
Пристигнатите барања од граѓаните ќе се разгледуваат по редослед на поднесување, односно по принципот „прв дојден, прв услужен“.
Од локалната самоуправа напоменуваат дека надлежната комисија ќе има право да изврши увид на лице место за да ја потврди поставената опрема кај апликантите.
Сите заинтересирани граѓани дополнителни информации за условите и потребната документација можат да добијат во просториите на општината или на нејзината официјална веб-страница.