Познатата новинарка и главна меѓународна дописничка на Си-ен-ен, Кристијан Аманпур, реагираше по смртта на поранешниот командант на Војската на Република Српска, Ратко Младиќ, кој почина во притвор на Обединетите нации во Хаг на 84-годишна возраст.
Во објава на социјалната мрежа Икс, Аманпур оцени дека со смртта на Младиќ заминал „еден од најбруталните убијци во светот“, потсетувајќи на злосторствата за кои тој беше осуден.
Таа посочи дека Младиќ доживеал длабока старост, за разлика од десетиците илјади негови жртви, и посебно се осврна на геноцидот во Сребреница, каде во јули 1995 година беа убиени повеќе од 8.000 бошњачки мажи и момчиња.
Младиќ во 2017 година беше осуден на доживотен затвор за геноцид, злосторства против човештвото и воени злосторства извршени за време на војната во Босна и Херцеговина. Пресудата подоцна беше правосилно потврдена.
Аманпур истакна и дека е горда на работата на новинарите кои во текот на 1990-тите ги документирале злосторствата во Босна и придонеле тие да останат забележани и да бидат искористени во барањето одговорност пред меѓународните судови.
Смртта на Младиќ предизвика спротивставени реакции во регионот – дел од преживеаните и семејствата на жртвите порачаа дека неговата смрт не ги брише злосторствата, додека дел од српските националистички политичари повторно го претставија како херој и заштитник на српскиот народ.