Државната изборна комисија (ДИК) на денешната седница утврди дека Александра Николовска, Мартин Стојановски и Мито Андонов ќе бидат новите пратеници во Собранието на Република Северна Македонија. Тие ќе ги заменат досегашните пратеници Бети Стаменковска-Трајковска, Јане Мицевски и Дејан Проданоски, кои беа избрани за градоначалници на последните локални избори.
Како што појасни претседателот на ДИК, Борис Кондарко, новите пратеници се следни на листата на коалицијата „Твоја Македонија“. Николовска и Стојановски доаѓаат од Изборната единица 1, а Андонов од Изборната единица 4.
Иако пред Стојановски на листата се наоѓа Игор Никовски, тој писмено ја известил ДИК дека се откажува од мандатот, поради што местото му припаѓа на Стојановски.
Кондарко најави дека ДИК веднаш ќе го извести Собранието за новите тројца пратеници, кое потоа треба да ги верификува нивните мандати.
Собранието претходно денеска констатираше дека мандатите на Стаменковска-Трајковска, Мицевски и Проданоски престануваат, откако тие беа избрани за градоначалници — на Кисела Вода, Сопиште и Прилеп, соодветно.
Дополнително, ДИК донесе Одлука за исплата на надомест на своите вработени, на припадниците на МВР и на другите лица ангажирани за враќање на уредите за биометриска идентификација на гласачите користени во изборниот процес. По нивното враќање, од уредите ќе бидат избришани сите внесени податоци.