Сојузот на стопански комори на Македонија (ССКМ) денеска организира тркалезна маса посветена на транспортот и логистиката, со фокус на воведувањето на електронскиот товарен лист (е-ЦМР).
Под мотото „Кон транспорт без хартија и без бариери – Дигитален товарен лист, отворени граници“, на настанот ќе се соберат претставници на бизнис-заедницата и надлежните институции, со цел да се разговара за конкретните предизвици при воведувањето на е-ЦМР, како и за административните и институционалните бариери во транспортот.
Од ССКМ посочуваат дека електронскиот товарен лист е значаен чекор кон дигитализација и модернизација на транспортниот сектор. За негово целосно функционирање, како што велат, потребни се интероперабилност на системите, подобра координација меѓу институциите и воспоставување заедничка институционална архитектура преку едношалтерски систем (One Stop Shop).
На тркалезната маса ќе биде претставен предлог-моделот за ваквата архитектура, како и законските измени и институционалните чекори потребни за имплементација на системот.
Целта е да се овозможат помалку документи, побрзи процедури и поефикасен проток на стоки, а со тоа да се намалат времето и трошоците за транспортните и логистичките компании.
На настанот се очекува присуство на претставници од Министерството за транспорт, Министерството за финансии, Управата за јавни приходи, Царинската управа, Министерството за економија, Министерството за надворешни работи, Министерството за европски прашања, Кабинетот на претседателот на Владата, Министерството за дигитална трансформација и Министерството за внатрешни работи – Гранична полиција.