Ведрана Рудан отсекогаш отворено зборувала за својот приватен живот, па така се знае дека двапати била мажена.
Со првиот сопруг била во брак 14 години, и со него ги добила двете деца – ќерката Асја и синот Славен. Писателката често зборувала дека во првиот брак доживеала насилство, а својот поранешен сопруг го поистоветувала со својот татко.
„Првиот маж кој ги исполнуваше естетските критериуми – толкави раменици, вакви колкови, таква коса, волшебна насмевка, такви очи – си реков, ете, тоа е тој. Другите сигнали не сакав да ги видам. Мојот прв сопруг беше мојот татко, само во друга форма и многу полош, многу поперфиден и полукав. Еден ден шлаканица, другиот букет цвеќе – сигурен психопат“, раскажувала Ведрана.
„Бев збунета, како и сите жени кои трпат насилство, бидејќи денес ќе те претепа, а утре ќе ти донесе букет цвеќе и ќе ти каже: „Не ме провоцирај, па сè ќе биде во ред“, искрено зборувала Ведрана.
Додека сè уште била во брак, Ведрана запознала помлад адвокат, со кого започнала љубовна врска, по што се развела. Ведрана отворено раскажувала дека во првиот брак никогаш не била среќна, а дека со вториот партнер научила многу.
Вториот сопруг на Ведрана бил осум години помладиот адвокат Љубиша Драгељевиќ, со кого до крајот на животот била во хармоничен брак, а парот живеел во Риека.
„Љубиша ме научи на толеранција. Ме промени на подобро. А моите деца се многу пообразовани од мене. Славен има прочитано илјадници книги, а Асја зборува четири јазици, но јас сум им лош ученик. Немам повеќе време за учење. Сепак, децата со самото свое раѓање ми покажаа дека постои безусловна љубов“, раскажувала Ведрана.