Министерката за финансии, Гордана Димитриеска-Кочоска, во рамки на официјалната посета на Словачка, денеска одржа работен состанок со својот колега Ладислав Каменицки. Во фокусот на разговорите беше дигитализацијата на даночните процеси, при што министерката најави дека системот за е-фактура во Македонија ќе биде целосно имплементиран до крајот на оваа година.
Димитриеска-Кочоска истакна дека Словачка е значаен пример за тоа како технологијата може да ги сопре даночното затајување и сивата економија преку алатки како е-фискализација и QR плаќања.
„Нашиот фокус е јасен – стабилни јавни финансии и дигитализација на услугите. Искуствата од Словачка како земја членка на ЕУ се од суштинско значење за нашите реформи,“ нагласи министерката.
Словачкиот министер Каменицки потврди дека неговата земја е подготвена за целосна размена на експертиза за да го поддржи економскиот развој и евроинтеграцијата на Македонија.