Министерството за економија и труд воведува нов пристап во следењето на трошоците за живот на граѓаните, преку пресметка на просечната потрошувачка кошница која се темели на официјални статистички податоци, реално остварената потрошувачка на домаќинствата и цените на производите и услугите на пазарот.
На денешниот брифинг со претставниците на медиумите, министерот за економија и труд Бесар Дурмиши ја презентираше новата методологија, нагласувајќи дека целта е да се обезбеди реална, објективна и транспарентна слика за трошоците на домаќинствата во Северна Македонија.
„Нашата цел е јасна – да имаме реална и објективна слика за тоа колку трошат домаќинствата. За разлика од проценките што се прават според посакуваните потреби, нашата методологија се базира на податоци за реално остварената потрошувачка, во согласност со меѓународно прифатените статистички класификации“, истакна министерот Дурмиши.