Државниот пазарен инспекторат (ДПИ) од 10-ти до 20 мај спроведува интензивни контроли во сите ланци маркети во државата. Доколку се утврди дека има неосновано зголемување на маржите, надлежните ќе преземат соодветни мерки, најави денеска министерот за економија и труд, Бесар Дурмиши.
Според министерот, на терен во моментов се активни 30 инспекциски тимови. Првичните неофицијални информации по првите четири дена од почетокот на надзорите покажуваат дека е забележано одредено поевтинување кај овошјето и зеленчукот.
Во однос на останатите прехранбени производи, Дурмиши појасни дека во овој момент нема законска основа за интервенција врз цените, но нагласи дека како можна идна мерка се разгледува намалување на данокот на додадена вредност (ДДВ).
-Немаме основа по која би постапиле. Ќе ја анализираме ситуацијата до крајот на месецов. Може да го намалиме ДДВ за прехранбените производи. Како што реагиравме во делот на горивата, така може да реагираме и во овој сегмент. Нашите контроли се вршат врз маржите што ги ставаат производителите, трговците и дистрибутерите. Ако видиме дека во вакви услови на криза и неизвесност, се однесуваат девијантно и ги зголемуваат маржите, ќе реагираме со соодветни мерки, како што реагиравме минатиот пат, со административните мерки кои ни се на располагање, истакна министерот.
Ресорното министерство ја потенцира и увозната зависност на државата како клучен фактор за дефинирање на малопродажните цени на пазарот.
-Цената на прехранбените производи кои се увозни не ја одредуваме ние, ниту нашите трговци, туку тие земји. Ние контролираме дали е зголемена маржата. Имаме можност, во рамки на Законот, да постапуваме со механизмите кои ни се на располагање ако се зголемува маржата кај производителите, трговците и дистрибутерите, подвлече Дурмиши.
На прес-конференцијата беше отворено и прашањето за стапката на инфлација, при што министерот направи компарација со моменталните економски показатели во другите европски и регионални држави.
-Во Романија инфлацијата е 9 отсто, во Бугарија 6,2, во Хрватска 4,6 проценти. Инфлацијата е зголемена, но така е и во други земји. Кај нас инфлацијата е до пет отсто, но, се справуваме и реагираме соодветно. Во таа насока е и денеска објавената мерка за кофинансирање на занаетчиите, малите и средните претпријатија, за зголемување на нивната продуктивност и произвостдво, рече тој.
Официјалниот извештај со податоци од сите контроли Државниот пазарен инспекторат треба да го достави до Министерството за економија и труд на 20 мај, по што ќе се носат понатамошните одлуки.