Цените на суровата нафта на светските пазари паднаа за околу четири проценти по објавата на американскиот претседател дека е постигнат мировен договор со Иран, пренесуваат светските медиуми.
Соединетите Држави ќе ја прекинат поморската блокада на иранските пристаништа во замена за слободен проток на комерцијалниот сообраќај низ Ормускиот Теснец.
Како што пренесува Си-ен-ен, цените на суровата нафта од типот „брент“ паднаа за 3,9 проценти и таа се продава за околу 84 долари за барел.
Истовремено, цената на американската сурова нафта бележи пад за 4,8 проценти и изнесува 81 долар за барел.
Доколку се стабилизира на тоа ниво, тоа ќе биде најниската цена на сурова нафта од 4 март, само неколку дена по почетокот на израелско-американските напади врз Иран.
Како што наведува Си-ен-ен, „црното злато“ има уште долг пат пред себе додека да се врати на цената под 70 долари за барел, по која се продаваше пред почетокот на нападите на 28 февруари.
Американскиот претседател, Доналд Трамп доцна синоќа на социјалните мрежи објави дека е финализиран мировниот договор, а потврда стигна и од официјален Техеран, од каде соопштија дека потпишувањето се очекува в петок во Швајцарија.
Според поголемиот дел од аналитичарите, за да се нормализира состојбата со протокот на нафта низ Ормускиот Теснец ќе биде потребно извесно време, што ќе се рефлектира и на цените на нафтата кои уште подолг период ќе останат високи.
Пазарите нафтените бунари на Блискиот Исток беа во голема мера затворени за време на војната, па експертите предупредуваат дека на бунарите можеби ќе им бидат потребни недели за да се вратат на претходното ниво.
Енергетските експерти остануваат претпазливи околу брзината на стабилизацијата на теренот.
„Одлично ќе биде ако тоа се случи, но ќе поверувам кога ќе видам вистински бродови како слободно и непречено минуваат низ теснецот“, вели Џо Мекмонигл, претседател на тинк-тенкот „Глобален центар за анализа на енергија, кој живее и работи во Саудиска Арабија, за Си-ен-ен.