Основниот суд во Штип денеска донесе пресуда со која Стојанче Зарков е осуден на доживотен затвор за убиството на својата 84-годишна мајка Марија, извршено во август минатата година.
Судечкиот совет ги прифати доказите на обвинителството, според кои Зарков во алкохолизирана состојба го извршил грозоморниот чин. Клучен момент за докажување на вината беа вештачењето на ножот и ДНК анализата на отисоците и крвта, кои неприкосновено потврдија дека тој е сторителот. Дополнително, како тежок товар на обвинетиот му падна и снимката од повикот кон итните служби веднаш по настанот, каде тој изговара: „Ја прободев несакајќи мајка ми, или ќе преживее или нема“.
Зарков, кој во Штип е познат како поранешен угостител и сопственик на култната кафеана „Гроф“, во текот на целиот процес негираше вина. На последното рочиште пред неколку дена, тој тврдеше дека има „дупка во сеќавањето“. Според неговата верзија, тој ден ги извршувал вообичаените обврски, ѝ купил лекови и храна, а вечерта се вратил со такси. Тврдеше дека бил во другата соба кога слушнал викање и ја нашол мајка си со крв на вратот, негирајќи дека се сеќава на моментот на убиството или на повикот кон Брзата помош. Судот, сепак, не го прифати ова одбрана.