Ново поголемо дестабилизирање на атмосферата и формирање на нестабилни влажни бранови се очекуваат во текот на утрешниот и задутрешниот ден во Македонија.
Според прогнозата на метеорологот Славчо Попоски, земјава во вторник и среда (16 и 17 јуни 2026 година) во попладневните часови ќе биде под влијание на поладен атмосферски фронт од север.
Како последица на овој бран, на повеќе места во државата ќе се развиваат конвективни облачни грмотевични јадра кои ќе донесат пороен дожд, грмежи и засилен ветер.
Поради загреаната атмосфера исполнета со енергија, локално процесите ќе бидат интензивни и ќе има појава на невреме проследено со обилен пороен дожд, силни електрични празнења и град.
Промената на времето во попладневните часови ќе го зафати и Скопскиот регион, каде ќе има развој на нестабилност со пороен дожд, грмежи, засилен ветер и услови за појава на невреме со град.
Што се однесува до температурите, тие во овие два дена ќе се искачуваат во интервалот од 26 до 34 степени.
Во Скопје и околината во текот на овие два дена максималната температура ќе се искачи до околу 30, односно 31 степен.