Силна, модерна и ефикасна Царинска управа е клучна за стабилни јавни финансии, заштита на економијата и поддршка на стопанството. Оваа порака ја упати министерката за финансии Гордана Димитриеска-Кочоска во своето видео-обраќање по повод 14 Април – Денот на Царинската управа, која годинава одбележува 34 години од своето основање.
Министерката нагласи дека Владата останува цврсто определена за сеопфатна модернизација и дигитализација на институцијата, како и за континуирано јакнење на нејзините човечки капацитети. Целта на овие реформи е поефикасна наплата на буџетските приходи, олеснување на трговијата и создавање предвидлива деловна средина.
„Царинската служба има клучна улога во олеснувањето на трговијата, администрирањето на Договорите за слободна трговија, унапредување и заштита на националната економија и наплата на буџетските приходи. Доброто функционирање на секоја царинска служба претставува посебен општествен и државен интерес и приоритет“, истакна министерката.
Осврнувајќи се на актуелните глобални економски и енергетски предизвици, Димитриеска-Кочоска потенцираше дека Владата презема мерки за заштита на стандардот на граѓаните и бизнисот, без притоа да се наруши фискалната стабилност.
Таа додаде дека стручната поддршка на царинските работници е неопходна за одговор на новите предизвици кои доаѓаат од брзата глобализација, особено во делот на борбата против нелегалните финансиски текови, организираниот криминал и даночната евазија.
„Така ќе продолжиме да остваруваме резултати кои во изминатиот период покажуваа раст на приходите при увоз и ќе изградиме систем во кој има доверба и бизнис заедницата и граѓаните. Само заеднички можеме да придонесеме системот да биде здрав, ефикасен и во функција на сите“, заклучи Димитриеска-Кочоска, упатувајќи благодарност до сите вработени за нивната 34-годишна посветеност и професионалност.