Американскиот претседател Доналд Трамп изјави во средата дека примирјето со Иран е „завршено“ откако двете страни повторно разменија напади, но додаде дека преговарачите би можеле да продолжат со разговорите со Техеран. Трамп остро ги нападна властите во Иран, неколку часа откако САД во текот на ноќта извршија напади врз Исламската Република, а Иранската револуционерна гарда соопшти дека цел на нивните одзмаднички напади биле американски бази во Персискиот Залив.
Одговарајќи на прашање на самитот на НАТО во турската престолнина Анкара за тоа дали примирјето со Иран сега е дефинитивно завршено, американскиот претседател беше дециден во својот став.
„Микам дека е завршено. Не сакам повеќе да имам работа со нив, тие се џган. Тие се џган, болни луѓе, водени од болни луѓе, и се сурови и насилни луѓе. Ако имаа нуклеарно оружје, ќе го употребеа. Што се однесува до мене, сè е завршено.“
Трамп ги обвини Иранците дека повеќепати погрешно го претставувале она што било договорено во рамките на примирјето што Вашингтон и Техеран го потпишале на 17 јуни.
„Сите се согласија – без нуклеарно оружје. Постигнуваме договор. Потоа тие излегуваат надвор и се шегуваат со медиумите, велејќи дека никогаш не сме разговарале за тоа. Нешто не е во ред со нив, тие се лудаци“, додаде Трамп.
Генералниот секретар на НАТО, Марк Руте, кој во тој момент се среќаваше со Трамп, јасно ги поддржа американските напади врз Иран.
„Мислам дека тоа што го направивте синоќа беше апсолутно неопходно. Тоа беше многу силен одговор и јас сум на ваша страна во ова прашање“, изјави Руте.
Но, и покрај ваквата поддршка, американскиот претседател јавно ја критикуваше Алијансата и европските сојузници поради тоа што одбиле директно да се вклучат во конфликтот со Техеран.
„Не сум задоволен од НАТО затоа што не сакаше да ни помогне во врска со најголемиот државен спонзор на тероризмот, а тоа е Иран. Не беа подготвени да ни помогнат. Разговарав со Обединетото Кралство и премиерот ми рече: ‘Сега не сакаме да ви помогнеме, но ќе ви помогнеме кога војната ќе заврши.’ Му реков дека тоа не е добро. Истото беше и со Германија – не сакаа да помогнат. Разговарав и со Франција – ниту тие не сакаа да помогнат.“
Како контекст на овие изјави, американската војска претходно соопшти дека погодила повеќе од 80 цели, вклучувајќи ирански брзи воени чамци, како одговор на иранските напади врз бродови во стратешки важниот Ормусски Теснец, по што цените на нафтата на светските берзи веднаш пораснаа за пет проценти.