Уставниот суд не успеа да дојде до мнозинство за претставката на политичката партија Левица за оценување на уставноста на делови од Изборниот законик поврзани со платеното политичко рекламирање.
Според информации од Судот, во моментот нема мнозинство од пет гласа „за“. Затоа за ова прашање ќе се одлуува на некоја наредна седница, што значи дека предметот останува отворен во фаза на гласање. Сепак, оттаму не прецизираат колку од судиите ја поддржуваат иницијативата на Левица.
Од „Левица“ претходно оценија дека денешната седница ќе биде тест дали институцијата што треба да биде последниот чувар на Уставот ќе го заштити принципот на еднаквост или ќе го легализира единствениот случај на институционализирана политичка цензура во поновата македонска демократија.
– Одлуката што ќе ја донесе Уставниот суд ќе покаже дали оваа институција воопшто ја врши својата функција или ќе стане последната алка во легализирањето на партиски конструирана нееднаквост. Доколку Судот ја аминува оваа одредба, ќе испрати порака дека Уставот завршува таму каде што започнува интересот на ДПМНЕ и трулиот бипартизам. Со таква одлука, Уставниот суд ќе биде инструмент за цементирање на партиските канџи врз изборниот процес и политичкиот плурализам, велат од Левица.