Полицијата во последните 24 часа евидентирала десет пријави за семејно насилство во повеќе градови низ земјава. Интервенции имало во Скопје, Радовиш, Велес, Охрид, Гостивар и Тетово, а четири лица биле лишени од слобода поради физички напади, закани и семејни расправии.
Во Скопје, 34-годишна жена пријавила дека во село во општина Зелениково била физички нападната од нејзиниот 65-годишен свекор, по претходна расправија.
На подрачјето на Карпош, полициски службеници го привеле Д.К. (30) од Скопје, откако, според пријавата, физички ја нападнал својата 33-годишна сестра и оштетил дел од покуќнината во домот.
Во друг случај во главниот град, 39-годишна жена пријавила дека пред неколку дена во Кисела Вода била нападната од својот партнер А.А. (38).
Во радовишко село бил приведен 70-годишен маж, откако било пријавено дека физички ја нападнал својата малолетна внука. За случајот бил известен јавен обвинител, а осомничениот бил задржан во полициска станица.
Во Велес, 63-годишен маж пријавил дека неговиот 37-годишен син му упатувал закани. Во друг случај, 43-годишна жена од велешко пријавила дека била нападната и заплашувана од својот поранешен сопруг.
Насилство било пријавено и во Охрид, каде маж физички го нападнал својот 64-годишен татко во семејниот дом.
Во Гостивар, полицијата го привела З.Ѓ. (71), откако бил пријавен дека физички ги нападнал својот син и снаата.
Во Тетово бил приведен 72-годишен маж, кој, според пријавата, со тврд предмет ја нападнал својата 66-годишна сопруга.
Дополнителен случај бил пријавен и во тетовско, каде 70-годишник пријавил дека бил нападнат од својот зет во маркет.
Од Министерството за внатрешни работи информираат дека се преземаат мерки за целосно расчистување на сите случаи, по што ќе бидат поднесени соодветни пријави.