Регулаторната Комисија за Енергетика денеска треба да донесе одлука за нови цени на горивата во Македонија, а премиерот Христијан Мицкоски во саботата изјави дека очекува стабилизација на пазарот со нафтените деривати.
– Ние правевме наши калкулации, малку е зголемена и вредноста на доларот. Очекувам во понеделник врз основа на тие калкулации, бензините некаде околу четири денари по литар да се намалат, а дизелот нешто повеќе, околу седум денара по литар да се намали. Така што да почекаме во понеделник Регулаторната комисија официјално да соопшти, изјави Мицкоски, кој присуствуваше на поставување камен-темелник на нова детска градинка во општина Карпош за време на викендот.
Премиерот очекува дека со финализацијата на мировните преговори меѓу САД и Иран ќе се стабилизира цената на нафтата на светските берзи и целата ситуација со енергенсите, но нагласува дека сепак тоа ќе биде процес којшто нема да се заврши од денес за утре.
Со финализирањето на кризата, Мицкоски очекува да се влезе во помирни води и до крајот на годината просечната цена за барел да биде меѓу 70 и 80 долара.