Православните верници денеска го одбележуваат празникот Отсекување на главата на Свети Јован Крстител, посветен на маченичкото погубување на последниот старозаветен пророк. Овој празник во народниот говор е познат и како Свети Јован Сечиглав или Свети Јован Отсечен, а Црквата за овој ден пропишува строг пост.
Свети Јован е наречен Крстител затоа што го крстил Исус Христос во реката Јордан, но и Претеча бидејќи со своето учење го најавувал доаѓањето на Спасителот. За време на своите проповеди, тој им порачувал на верниците: „Јас ве крштевам со вода, а тој што ќе дојде по мене ќе ве крсти со Дух Свети“. Неговото сведоштво за Христа е забележано и во Евангелието: „Он треба да расте, а јас да се смалувам! Кој доаѓа одозгора, тој е над сите, а кој доаѓа од земјата, земен е и како земен зборува. Кој доаѓа од небото над сите е“.
Според светото предание, причина за неговото погубување биле жестоките критики упатени кон управникот на Галилеја, Ирод Антипа, кој ја истерал својата законита жена и се оженил со Иродијада, сопругата на својот жив брат Филип. Јован јавно го осудувал овој чин со зборовите: „Не ти личи да ја земеш жената на брат ти“, поради што бил затворен.
На роденденската прослава на Ирод, ќерката на Иродијада, Саломија, танцувала пред гостите, по што пијаниот владетел ѝ ветил дека ќе ѝ исполни каква било желба. По совет на нејзината мајка, Саломија ја побарала главата на Јован Крстител на послужавник. Ирод го исполнил ветувањето, по што џелатите му ја отсекле главата на светителот во самицата.
Неговите ученици го зеле телото и чесно го погребале, додека Иродијада ја закопала главата на скриено место, од каде подоцна била откопана и пренесена во Ерусалим. Според преданието, сите учесници во погубувањето ги стигнала казна: Ирод и Иродијада биле прогонети и завршиле во беда, додека Саломија го загубила животот трагично.
Црквата го одбележува овој настан на 11 септември (29 август според стариот календар), односно на денот кога била осветена црквата подигната над неговиот гроб во Севастија од страна на царот Константин и царицата Елена. Во македонската народна традиција, овој празник се почитува со строг пост без употреба на масло и риба, а во верувањата Свети Јован е познат и како заштитник на кумството и побратимството.