Во Собранието денеска започна Регионалната конференција за фемицид во Југоисточна Европа, во организација на Мисијата на ОБСЕ во Скопје. На дводневниот настан учествуваат претставници на институции, парламенти, правосудството, меѓународни организации и граѓанскиот сектор од регионот.
Во фокусот се законодавните и институционалните одговори на фемицидот, парламентарниот надзор, механизмите за следење и собирање податоци, како и стандардите за идентификување и истражување на родово поврзаните убиства.
Потпретседателката на Собранието Весна Бендевска ја истакна одговорноста на парламентот не само во носењето закони, туку и преку надзорната и буџетската функција да следи дали тие се спроведуваат и дали институциите имаат доволно ресурси.
На конференцијата беше нагласено дека фемицидот не треба да се третира како изолиран или приватен семеен проблем, туку како најекстремна форма на родово базирано насилство, при што превенцијата бара координирана работа на институциите.
Генералниот секретар на ОБСЕ Феридун Х. Синирлиоглу, преку видеопорака, порача дека насилството врз жените е сериозно прашање за човековите права и безбедноста, додека амбасадорот Килиан Вал, шеф на Мисијата на ОБСЕ во Скопје, ја нагласи потребата од конкретни мерки, координација и доследно спроведување на законите.
Посебно внимание беше посветено на иницијативата Femicide Watch, која има цел да собира и анализира податоци за родово базираните убиства и да придонесе кон креирање политики за превенција засновани на докази.
На конференцијата се разговара и за искуствата од регионот, парламентарниот надзор, истрагите на случаи на фемицид и обиди за фемицид, како и за унапредување на мултисекторската поддршка за жртвите на родово базирано насилство.
Конференцијата продолжува утре, кога се очекува да бидат презентирани заклучоци, препораки и следни чекори.