Ризиците од заразните болести што ги пренесуваат комарците, вклучително и Западнонилската треска, можат значително да се минимизираат со правилна примена на методите за превенција и заштита.
Ова го порача епидемиологот д-р Драган Даниловски во интервју за ТВ Телма.
Според д-р Даниловски, тигрестиот комарец е значително подоминантен, повитален и посупериорен од поранешниот „домашен“ комарец и, за разлика од него, тој е активен и напаѓа во текот на целите 24 часа.
Поради тоа што тигрестиот комарец е способен да се размножува дури и во исклучително мали количини вода, д-р Даниловски упатува апел за редовно чистење на дворовите и балконите.
Тој предупредува дека дури и најмалата количина вода во тацните под саксиите и вазните е доволна за нивно размножување, додека старите автомобилски гуми претставуваат идеални „резервоари“ за застоена вода и вистински рај за комарците.
Епидемиологот советува редовно да се менува водата во садовите за миленици, а олуците и пластичните буриња редовно да се чистат за да не се задржува вода во нив.
Покрај отстранувањето на застоената вода, како основни мерки за лична заштита се препорачуваат носење соодветна облека со долги ракави и ногавици, како и поставување заштитни мрежи на прозорците и вратите.
Најголем ризик од развивање тешка форма на болеста имаат постарите лица, хронично болните и лицата со ослабен имунитет.
Д-р Даниловски предупредува дека доколку се забележат симптоми како висока телесна температура, силна главоболка, кочење на вратот, нарушена свест или појава на парализа, граѓаните мора веднаш да побараат лекарска помош.