Наместо со славје, преминот од старата во новата година за дел од граѓаните во Скопје поминал во знакот на насилство, агресија и инциденти. Министерството за внатрешни работи (МВР) информираше за бурна ноќ на скопските улици, каде полицијата морала да интервенира во повеќе наврати поради физички пресметки, нарушување на јавниот ред и мир, па дури и пожар.
Малолетници претепале девојче во Влае Серијата пријави започнала со случај на врсничко насилство. На 31 декември, 42-годишна жена од село Волково пријавила дека нејзината 16-годишна ќерка била физички нападната во парк во населбата Влае. Нападот го извршиле двајца малолетници кои девојчето ги познавало.
Нервоза во Центар и Аеродром: Тепачки за паркинг и во гаражи Попладневните часови пред дочекот донеле зголемена нервоза. Во 17:10 часот, полицијата го привела С.Т. (42) од Радовиш, кој агресивно се однесувал кон три лица во Аеродром. Само половина час подоцна, во 17:45 часот, избила тепачка во катна гаража во строгиот центар на Скопје. Во пресметката учествувале четири лица, од кои еден е државјанин на Германија.
Тензиите продолжиле и во 19:30 часот, кога банална расправија за паркинг-место во Центар прераснала во тепачка меѓу тројца скопјани, кои веднаш биле приведени. Еден час подоцна, регистриран е и напад меѓу две женски лица пред угостителски објект во централното подрачје.
Напад врз полиција по журката во „Борис Трајковски“ Инцидентите не престанале ниту во раните утрински часови на 2026 година. По завршувањето на големата забава во Спортскиот центар „Борис Трајковски“, во 04:15 часот утринава, приведен е 34-годишниот Д.М. од Валандово. Тој, наместо да си замине, се однесувал агресивно и ги нападнал полициските службеници кои вршеле службени дејствија на местото.
Изгоре штала во Гази Баба Покрај тепачките, скопските пожарникари имале работа и со оган. Во 22:20 часот, додека градот се подготвувал за одбројување, во населбата Гази Баба избувнал пожар во штала, сопственост на 41-годишен скопјанец. За среќа, нема повредени лица, а пожарот бил брзо локализиран од екипа на Бригадата за противпожарна заштита.
Од МВР најавуваат дека по целосно документирање на сите наведени случаи, против сторителите ќе бидат поднесени соодветни пријави.