Јавното комунално претпријатие „Чистота и зеленило“ Куманово доби две нови специјализирани возила за изнесување смет, информираа денеска од претпријатието. Средствата за набавка се обезбедени преку Бирото за рамномерен регионален развој и Министерството за локална самоуправа, со имплементација од Центарот за развој на Североисточниот плански регион. Новите возила ќе се користат за собирање отпад во потесни и тешко пристапни улички низ Куманово.
„Презадоволни сме од набавката на овие возила кои дополнително ќе ги подобрат условите за изнесување и депонирање на смет. Многу е важно за граѓаните кои живеат во потесни улички да добијат навремена и квалитетна услуга“, изјави директорот на претпријатието Ненад Стојановски.
Претпријатието во моментов располага со околу дваесетина возила, од кои дел се во неисправна состојба и често не можат да се поправат. Стојановски изрази надеж дека општината ќе продолжи со инвестиции во нова механизација, како преку сопствени средства, така и преку проекти со поддршка од државата.
Поранешната претседателка на Советот на општината, Ивана Ѓорѓиевска, информираше дека вредноста на набавката изнесува над 1,6 милиони денари.
„Многу е важно да се подобри квалитетот на изнесување на смет во потесни улички. Граѓаните од неколку населби реагираа дека, поради непристапноста на теренот, им се потребни вакви возила“, изјави Ѓорѓиевска.
Во рамки на истиот проект ќе биде набавено уште едно специјализирано возило за потребите на претпријатието, а општините Ранковце и Старо Нагоричане ќе добијат нови садови за смет.