Во последното деноноќие на територијата на земјава се регистрирани 33 пожари на отворен простор, информира Центарот за управување со кризи. Од нив, четири се сè уште активни, четири се ставени под контрола, додека 25 се целосно изгаснати.
Активни се пожарите во општините Студеничани и Зелениково, кај селата Моране и Вртекица и кај Рамни Габер, со крак кон Палиград и Вражале. Пожари има и во Македонски Брод, во близина на месноста Видуш и селата Драгов Дол и Локвица, како и во Кичево, кај селото Тајмиште и месноста Дарда. Активен пожар е регистриран и во Гостивар, во близина на селото Горна Ѓоновица.
Под контрола се пожарите кај селото Илинден, во близина на делчевското село Бигла, кај селото Туденце во Општина Јегуновце, како и во Општина Врапчиште, кај селата Ломница и Ѓерѓевиште.