Кривичниот суд му одреди 30-дневен притвор на 19-годишниот Б.И. од Скопје, осомничен за насилство во инцидентот во Чаир во кој со нож беа повредени три лица. Неговиот 13-годишен брат, за кого полицијата соопшти дека ги нанел убодните рани, нема кривично да одговара бидејќи е под законската граница за кривична одговорност.
Според Судот, притворот на 19-годишникот е определен поради опасност од бегство, можност за влијание врз сведоци и опасност од повторување на делото. Тој е осомничен за кривичното дело „насилство“.
Инцидентот се случил на 31 август околу 22 часот во Чаир. Според МВР, 13-годишникот со нож им нанел убодни рани на три лица на возраст од 13, 16 и 19 години. Најтешко е повредено 13-годишно дете кое, според Министерството за здравство, има убодна рана во срцето, било оперирано и е на интензивна нега.
Од Јавното обвинителство појаснија дека дете кое во моментот на извршување на дејствието нема наполнето 14 години не подлежи на кривична одговорност. Во такви случаи се известува надлежниот Центар за социјална работа, кој може да преземе мерки за помош и заштита.