Цената на нафтата денеска достигна највисоко ниво во последните четири години. Ваквиот скок доаѓа откако порталот „Аксиос“ објави дека американската команда ќе го информира претседателот Доналд Трамп за можни воени акции против Иран, што ги засили стравувањата од нова ескалација на Блискиот Исток.
На лондонската берза, нафтата „Брент“ за испорака во јуни изутринава порасна за дури 6,84 отсто, достигнувајќи 126,10 долари за барел. Подоцна цената се стабилизира на околу 123,7 долари, што сепак е за 4,8 отсто повеќе од вчера. Истовремено, американската „лесна“ нафта ја надмина границата од 110 долари.
Ова е највисоко ниво на цената на „Брент“ од почетокот на 2022 година. Трамп, според извештаите, веќе го одбил предлогот на Техеран за повторно отворање на Ормуската Теснина, што значи дека поморската блокада останува на сила.
Проблемите со снабдувањето дополнително ги потврдуваат и анализите на „Голдман Сакс“.
„Голдман Сакс“ проценува дека извозот преку таа клучна рута паднал на само четири отсто од вообичаеното, во мигови кога преговорите меѓу САД и Иран се во застој, а американската блокада дополнително го оптоварува снабдувањето.