Бугарската Агенција за безбедност на храната од утре воведува вонреден и засилен мониторинг на сите пристигнати пратки млечни суровини кои влегуваат во земјата од Европската Унија и од трети земји.
Според новата одлука, сите транспортни камиони ќе бидат запрени директно на граничните премини и нема да можат да влезат во земјата сè додека не пристигнат официјалните резултати од задолжителните лабораториски анализи.
Мерката официјално стапува на сила на 10 јуни 2026 година по наредба на извршниот директор на Агенцијата. Како главен мотив се наведува заштитата на домашниот пазар и обезбедувањето квалитетни и безбедни суровини за тамошното производство.
Радикалниот чекор на бугарските власти уследи по алармантните наоди од претходниот месец, кои покажаа сериозно потфрлање на стандардите кај увозниците.
„Конечната одлука беше донесена откако инспекциите во мај покажаа алармантни резултати – 24% од тестираните примероци од увезени млечни суровини не беа во согласност со прописите.“
Надлежните органи во Бугарија појаснуваат дека претходниот систем, кој дозволуваше контрола на веќе готовите производи во фабриките, создавал огромен административен и економски товар за бизнисите. Затоа, државата сега преминува кон директна забрана на суровините со лош квалитет на самата гранична линија.