Бројот на работниците во индустријата во периодот јануари – април 2026 година е намален за 3,0 проценти во однос на истиот период од 2025 година. Во април годинава, споредено со април лани, бројот на работниците е намален за 2,3 проценти, соопшти Државниот завод за статистика.
Според податоците, во секторот „Рударство и вадење камен“ е забележано намалување од 6,8 проценти, а во „Преработувачка индустрија“ од 2,2 проценти. Единствен раст е евидентиран во секторот „Снабдување со електрична енергија, гас, пареа и климатизација“ од 1,0 процент.
Анализата по главни индустриски групи покажува дека во април 2026 година, во однос на април 2025 година, бројот на работници е намален во групите „Енергија“ за 1,6 проценти, „Капитални производи“ за 2,3 проценти, „Нетрајни производи за широка потрошувачка“ за 3,1 проценти и „Интермедијарни производи, освен енергија“ за 2,8 проценти. Раст е забележан само во групата „Трајни производи за широка потрошувачка“ од 0,6 проценти.