Министерството за внатрешни работи бележи алармантна бројка на пријави за семејно насилство. Во изминатото деноноќие, на територијата на повеќе градови низ државата се евидентирани вкупно седум вакви инциденти, кои резултирале со лишување од слобода на три лица.
Најдраматично било во струмичко село и во Кавадарци. Во Струмичко, полицијата уапсила брачен пар (34-годишен маж и 29-годишна жена) откако двајцата меѓусебно се пријавиле за физички напад во нивниот дом. Тие се задржани во полициската станица во Струмица и за случајот е известен јавен обвинител.
Во Кавадарци, пак, полицијата спасила 46-годишна жена која била држена против нејзина волја. Уапсен е нејзиниот 41-годишен партнер, кој не ѝ дозволувал да го напушти домот, ја влечел за рака и ѝ упатувал закани. И тој е задржан зад решетки до поднесување на соодветна пријава.
Полицискиот билтен е полн со пријави и од другите градови. Во Кичево, сопруга пријавила физички напад од нејзиниот сопруг З.Р. Во Скопје се регистрирани три одвоени случаи: 84-годишна жена од Бит Пазар била нападната од нејзиниот 87-годишен сопруг кој имал здравствени проблеми; 52-годишна жена од Кисела Вода пријавила напад од сопругот В.А. (57); а во истата општина, 34-годишен маж пријавил дека бил физички нападнат од неговата партнерка.
Во Прилеп, 25-годишна жена побарала помош од полицијата откако била физички нападната од нејзината свекрва. Од МВР информираат дека за сите инциденти се преземаат мерки за целосно расчистување.