Билатералната соработка меѓу Северна Македонија и Шведска, како и заедничката определба за нејзино натамошно унапредување, беа потврдени на работна средба меѓу министерката за енергетика, рударство и минерални суровини Сања Божиновска и шведскиот амбасадор Ола Солстром.
Од Министерството за енергетика информираат дека во фокусот на разговорите биле можностите за продлабочување на соработката во областа на енергетската ефикасност, модернизацијата на енергетската инфраструктура и развојот на паметни и одржливи енергетски решенија, области во кои Шведска важи за еден од европските лидери.
Божиновска истакнала дека Владата останува посветена на модернизација на енергетскиот систем, зголемување на учеството на обновливите извори на енергија и создавање стабилен и конкурентен енергетски сектор.
Амбасадорот Солстром нагласил дека Шведска останува посветен партнер на земјава и дека постои интерес кај шведските компании за инвестирање во македонскиот енергетски сектор, особено во проекти поврзани со енергетска ефикасност, инфраструктура и зелени технологии.
На средбата било заклучено дека постои заедничка волја за интензивирање на соработката и развој на конкретни проекти во областа на одржливата енергија и енергетските реформи, кои треба да придонесат за економски раст, енергетска сигурност и забрзана зелена транзиција.