Енергетската иднина денес нема да ја чекаме, туку ќе ја градиме со знаење, со партнерство и со работа што остава трајни резултати, порача денеска министерката за енергетика, рударство и минерални суровини Сања Божиновска, на настанот по повод реализацијата на инвестицијата на „Алказар енерџи“ за изградба на ветерен парк во Штип.
Според најавите, за првата фаза од овој ветерен парк веќе е заокружена финансиската конструкција во износ од 180 милиони евра, а целиот проект треба да биде завршен за три години. Вкупната вредност на инвестицијата изнесува речиси половина милијарда долари, при што се очекува годишно производство од еден терават-час електрична енергија од обновливи извори и отворање на 300 нови работни места.
Министерката Божиновска нагласи дека енергетската независност бара конкретни чекори и одговорно управување.
„Енергетската независност не се прогласува, таа се гради — со нови производствени капацитети, одговорни инвестиции, знаење и институции што имаат јасни насоки. Затоа ветерниот парк во Штип има значење што ги надминува границите на еден проект и на една инвестиција. Нашата задача е ваквите капацитети да ги поврземе со поширока цел — поголема сигурност во снабдувањето, посилна економија и помала изложеност на надворешни енергетски потреси“, рече Божиновска.
Таа додаде дека државата мора сама да ја креира својата енергетска стабилност.
„Не смееме енергетската иднина на Македонија да ја оставиме само на условите што ги создаваат другите, мораме да ја градиме со капацитетите што ги создаваме тука. Токму во тоа е и улогата на Министерството за енергетика. Нашата институционална поддршка за ветерниот парк е дел од определбата да поддржуваме инвестиции во обновливи извори со предвидливи правила и со долгорочна развојна насока“, посочи министерката.
Божиновска подвлече дека за сериозните инвеститори е неопходно обезбедување на ефикасни и професионални институционални процедури.
„Ќе се залагаме за поефикасни постапки, но не и за пониски стандарди. Ќе ги поттикнуваме инвестициите, но ќе инсистираме тие да бидат одговорни кон просторот, животната средина и локалните заедници“, заклучи таа.