Министерката за енергетика, рударство и минерални суровини, Сања Божиновска, денеска најави дека Владата будно ги следи состојбите на берзите и дека е можна нова рунда преговори за продолжување на попустот за нафтените деривати по 18 мај.
„Следиме се што се случува. Нашите мерки моментално се до 18 мај, што значи дека следната недела ќе видиме што ќе се случува со цените на берзата и со војната. Неколку дена пред истекот на овој рок ќе видиме до каде сме со цените и ако е потребно повторно ќе преговараме со ОКТА за продолжување на попустот. Правиме се што е во интерес на нашите граѓани“, изјави Божиновска на средбата со новинарите.
Министерката истакна дека Македонија во моментов е трета според преземените мерки за ублажување на ценовниот шок и дека земјата ги има најниските цени на нафтените деривати во регионот.
Во однос на сомнежите за реекспорт на деривати, Божиновска информираше дека досега ниту една компанија не се обратила до министерството, но дека надлежните служби се веќе на терен.
„Државниот пазарен инспекторат и Царинската управа веќе проверуваат дали е правен реекспорт на деривати“, рече Божиновска.
Таа додаде дека Министерството ја поддржува идејата за ревизија на тарифните блокови за струја, доколку тоа донесе пониски сметки за граѓаните.