Австрија планира од следната година да воведе забрана за носење шамија за девојчиња под 14 години во училиштата, соопшти министерката за интеграција Клаудија Плаколм. Предлог-законот наскоро ќе се најде на расправа во Парламентот и треба да стапи во сила од учебната 2026/2027 година.
Плаколм изјави дека носењето шамија не е верски ритуал и дека ги учи девојчињата да „развијат чувства на срам“, што доведува до „нарушена слика за телото“ и „нестабилна самодоверба“.
Во 2019 година највисокиот суд ја поништи претходната забрана, но актуелната владина коалиција – ОВП, Социјалдемократите и НЕОС – верува дека овој пат има основа таа да биде изгласана. Тие укажуваат дека бројот на муслимански девојчиња под 14 години во училиштата пораснал од 3.000 на 12.000.
Според предлог-законот, доколку ученичка носи шамија, наставниците најпрво ќе разговараат со родителите, а при повторни прекршувања следува парична казна до 800 евра.
Исламската заедница во Австрија остро реагираше, обвинувајќи ја коалицијата дека ја користи темата за политички поени. „Целта е да се профитира од антиисламското расположение“, се наведува во нивната реакција.