„Епл“ се подготвува за една од најголемите промени во дизајнот на ајфонот во речиси две децении – претставување на првиот модел со преклоплив екран. Новиот уред, развиван со години под кодното име V68, треба да биде позициониран над досегашните про-модели и би можел да чини од околу 2.000 до 2.200 долари, а најскапите верзии да се доближат и до 3.000 долари.
Главниот екран се очекува да биде со дијагонала од околу 7,8 инчи, а надворешниот 5,5 инчи. Кога е склопен, телефонот би бил приближно со големина на пасош, додека отворен ќе овозможува полесна работа со повеќе апликации и гледање видеосодржини на поголем екран.
„Епл“ посветил особено внимание на еден од главните проблеми кај телефоните на преклопување – видливата линија на местото на превиткување. Компанијата развила нова шарка од титаниум и алуминиум и специјално заштитно стакло, со цел преклопот да биде помалку забележлив и поиздржлив.
Сепак, новиот модел може да има и компромиси во однос на класичните ајфони, меѓу кои послаба камера, пократко траење на батеријата и помала издржливост. И покрај високата цена, аналитичарите проценуваат дека „Епл“ би можел да продаде меѓу седум и десет милиони преклопливи ајфони уште во првата година.
Со овој модел „Епл“ влегува на пазар на кој „Самсунг“, „Хуавеј“ и „Гугл“ веќе неколку години нудат телефони на преклопување, а новиот ајфон ќе биде и првиот голем производ претставен под раководство на новиот извршен директор Џон Тернус.