Апелацискиот суд ја преиначи првостепената пресуда за убиството на кучето Феликс и наместо три месеци затвор, на осудениот Љубе Крстевски му изрече парична казна.
Настанот се случи на 7 јануари 2025 година кога кучето почина како последица од нанесени повреди, по што Основниот кривичен суд пред десет месеци ја изрече првата затворска казна за ваков вид кривично дело во Македонија.
Според новата пресуда донесена на 17 февруари годинава, во која увид имал „Слободен печат“, Апелација ја прифатила жалбата на Крстевски за кривичното дело убивање и мачење животни.
Со оваа одлука, затворската казна е заменета со 90 дневни глоби од по 20 евра, односно вкупно 1.800 евра или 110.700 денари, објави 4news.mk. Во истиот случај, второобвинетиот Билбиловски претходно доби парична казна од 100 дневни глоби.
Во жалбата до второстепениот суд, одбраната на Крстевски тврдела дека кучето било агресивно во кругот на објектот, приложувајќи видеоснимки, фотографии и медицински белешки, со барање затворската казна да се замени со условна или парична. Од друга страна, Вишото јавно обвинителство побарало потврда на затворот.
Апелацискиот суд не ги прифатил тврдењата на одбраната дека животното било опасно, посочувајќи дека кучето тежело околу 15 килограми и им пристапувало на луѓето без да ги напаѓа.
Судот во образложението оценил дека природното однесување на животното во кругот на објектот не може да биде оправдување за нанесување удари, како и дека доколку кучето навистина било опасно, случајот требало да биде пријавен кај надлежните институции.