Мнозинството руски граѓани сметаат дека војната во Украина ќе заврши во 2026 година, покажува анкетата на рускиот државен центар за истражување на јавното мислење ВЦИОМ. Заменик-директорот Михаил Мамонов изјави дека 70% од 1.600 испитаници веруваат дека 2026 година ќе биде „поуспешна“ за Русија во споредба со тековната, додека 55% го поврзаа овој оптимизам со можниот крај на она што Москва го нарекува „специјална воена операција“ во Украина.
– „Главната причина за оптимизмот е можниот крај на ‘специјалната воена операција’ и постигнувањето на поставените цели, во согласност со националните интереси дефинирани од претседателот Владимир Путин“, рече Мамонов.
Анкетата се толкува како сигнал од Кремљ за проценка на реакцијата на јавноста на евентуален мировен договор, во време на засилени дипломатски напори за завршување на конфликтот. Мамонов додаде дека офанзивата на руската војска, неподготвеноста на САД да продолжат со финансиска поддршка за Украина и неможноста на Европската Унија целосно да ја замени оваа поддршка се клучни фактори што влијаат на изгледите за мировен договор.
По завршувањето на борбените операции, приоритети ќе бидат реинтеграцијата на ветераните во општеството и реконструкцијата на регионите на Украина под руска контрола, како и на руските гранични области.
Според независниот центар Левада, околу две третини од русите ги поддржуваат мировните преговори, што е највисок процент од почетокот на војната.
Кремљ соопшти дека претседателот Путин бил информиран за контактите на руските претставници со тимот на американскиот претседател Доналд Трамп во врска со предлозите на САД за можен мировен договор. Путин изјави дека неговите услови за мир вклучуваат Украина да ги отстапи околу 5.000 квадратни километри од Донбас и да се откаже од намерата за приклучување на НАТО.