Опасноста од пожари и натаму е висока, а во моментов во државата има шест активни пожари на отворен простор, од кои неколку се посложени за гаснење, најкомплексен во моментов е пожарот во реонот Рамно на територијата на Општина Чучер Сандево, каде гори ниска вегетација, папрат, трева и грмушки, а на одредени места огнот зафаќа и шумска подлога – истакна директорот на Дирекцијата за заштита и спасување (ДЗС), Стојанче Ангелов.
Тој објасни дека поради специфичноста на теренот се создава голем чад кој ветрот го носи кон главниот град.
– Пожарот се движи по земјата и ја зафаќа лисната и тревната подлога, поради што се создаваат големи количини чад. Силниот ветер го насочува чадот кон Скопје и околните населени места на падините на Скопска Црна Гора -истакна Ангелов.
На терен интервенираат скопски пожарникари, неколку огнени тимови на ДЗС, припадници на Армијата, како и полициски хеликоптер кој дејствува на критичните точки со цел да се спречи ширењето на пожарот.
Директорот информира дека во текот на вчерашниот ден биле регистрирани повеќе од 30 пожари на отворен простор, од кои најголемиот дел се изгаснати благодарение на интервенциите на пожарникарите и останатите служби ангажирани во справувањето со огнените стихии.
Што се однесува до останатите жаришта, активен останува и пожарот над селата Грачани и Никиштане, кој се спушта кон Лепенец, но со намален интензитет и денеска се очекува да биде ставен под целосна контрола.
Повторно се активирал и пожарот на подрачјето меѓу Струга и Дебар, во атарите на повеќе села каде интервенираат струшките пожарникари, а активни огномети има и во атарот на селото Тајмиште во Општина Кичево и кај селото Белица во Општина Македонски Брод, каде теренот е исклучително тежок и непристапен.
Поради неповолните временски услови, од ДЗС упатија итна апел-порака до целата јавност.
– За денеска се најавени високи температури и засилен ветер. Доволна е само една искра за да предизвика сериозна катастрофа, затоа апелирам до сите граѓани одговорно да се однесуваат и да избегнуваат активности што можат да предизвикаат пожар – порача Ангелов.