Министерот за дигитална трансформација Стефан Андоновски учествуваше на настанот „Мерење на иновациите за одржлив и паметен раст“, организиран од Центарот за истражување и креирање политики (ЦРПМ) и Фондацијата Конрад Аденауер, каде во фокусот беше презентацијата на Индексот за конкурентност и иновации на Западен Балкан.
Во рамки на панел-дискусијата посветена на иновациските политики и дигиталната трансформација, Андоновски истакна дека Владата прави конкретен исчекор од регулатива кон директна имплементација на мерки што го поттикнуваат иновацискиот развој.
Тој посочи дека изминатата година бил донесен Законот за иновации, научно-технолошки развој и претприемништво, со што се поставени темелите за системска поддршка на иновациите, а годинава фокусот е ставен на директни инвестиции и практична имплементација.
Министерот нагласи дека Владата инвестира во два европски дигитални иновациски хабови кои работат по принципот „test before invest“ и се поврзани со универзитетите и стопанските комори.
Преку ИНОФЕИТ ЕДИХ, предводен од ФЕИТ, се инвестираат 1 милион евра, дополнителни 1 милион евра се инвестираат во ДИГИТ-МАК, предводен од ФИНКИ. Според Андоновски, овие центри имаат значајна улога во дигиталната трансформација на компаниите, институциите и развојот на домашниот иновациски екосистем.
Тој се осврна и на изградбата на центарот за вештачка интелигенција „Везилка“, за кој се обезбедени 2 милиони евра инвестиција, а кој ќе биде ставен на располагање и на јавниот и на приватниот сектор.
„Како Влада се движиме од регулација кон имплементација. Ако минатата година дефиниравме правила за иновации и го донесовме Законот за иновации, научно-технолошки развој и претприемништво, оваа година веќе инвестираме директно во иновациите. Тоа го правиме преку ИНОФЕИТ ЕДИХ и ДИГИТ-МАК, како и преку центарот за вештачка интелигенција ‘Везилка’. Продолжуваме со дигитализација на услугите за компаниите и приватниот сектор, со цел да создадеме подинамична, поефикасна и модерна администрација која ќе носи резултати и успех“, изјави министерот Андоновски.