Новиот клинички центар во Скопје најевтино и најдобро ќе биде да се изгради во непосредна близина на Градската општа болница „8 Септември“. Ова денеска го соопшти министерот за здравство Азир Алиу на брифингот со медиумите по повод една година од преземањето на функцијата, нагласувајќи дека реформите во секторот се веќе во тек, но бараат време.
Министерот појасни дека инвестициите во сегашниот комплекс „Мајка Тереза“ нема да запрат, бидејќи изградбата на нов објект ќе одземе неколку години.
„Не е трошење пари за џабе“, подвлече тој.
Како дел од внатрешните реформи за поголема контрола и реорганизација, Алиу информираше дека во дел од клиниките веќе е воведен системот за идентификација со отпечаток од прст, односно фингерпринт, а во план е и крупна дигитализација на менаџирањето со пациентите со цел да се укинат хартиените бројчиња.
Зборувајќи за инфраструктурата и лошите хигиенски услови на дел од клиниките, тој најави итни зафати, набавка на инвентар на државно ниво и проширување на капацитетите.
„На Онкологија е почнато со реновирање на тоалетите. На онкологија во план е да се гради плус уште еден кат“, најави министерот, меѓу другото.
Алиу направи рамнотежа на својот едногодишен мандат, посочувајќи дека здравството е исклучително сензитивен ресор за кој е потребна јасна стратегија.
„Периодот за една година е прекраток за да кажеме дека денеска имаме здравствен систем што е различен од вчера. Тоа што можам денеска да го кажам пред вас е дека денеска, тоа што го немавме пред една година, имаме јасна слика за здравствениот систем и јасна цел кај сакаме да стигнеме со реформите во здравството – и од инфраструктурна гледна точка и од човечки капацитети и од технологија и дигитална трансформација. Чест ми е денеска пред јавноста да кажам дека мапирањето на здравствениот систем ни ги кажа сите недостатоци во системот, но, исто така, ни даде – буст, ни даде енергија за да може да креираме и да предвидуваме проекти, со што здравството нема само да лечи, туку и ќе предвидува“, истакна Алиу.
На крајот, министерот најави дека на 24. овој месец Македонија официјално станува дел од европските здравствени системи преку полноправно членство во фондот „EU4Health“.
„Така, ние ние ќе бидеме полноправна членка на EU4Health, на една од најголемите или најголемиот здравствен фонд во Европа, од кој што ќе црпиме финансиски средства од Европа, ќе црпиме и технички и експертиза од нив. Потоа, имајќи предвид дека знаеме што треба да промениме во здравството, од јули, ќе почнеме да аплицираме на оваа програма и се надевам дека ова ќе ни дојде дополнителна енергија со цел да може да се забрзаат реформите во здравството“, подвлече министерот Алиу.