На конгресот одржан во Тетово, партијата Алијанса за Албанците предводена од Зијадин Села официјално го промени името во Албанска лига. Делегатите едногласно ја поддржаа промената, а со 713 гласа „за“, Села беше избран за претседател на новоформираниот политички субјект.
Конгресот се одржа под мотото „Лигата е жива“, а по изборот Села истакна дека функцијата носи голема одговорност кон членството, делегатите и идните генерации.
„Некој можеби мисли дека сум навикнат често да се качувам на оваа сцена, но не е така. Секогаш доаѓам со емоции и чувство на одговорност. Таа одговорност, порано како Алијанса за Албанците, а денес како Албанска лига, ја имаме пред генерациите што ќе ги наследат одлуките кои денес ги носиме“, рече Села.
Во своето обраќање тој порача дека Албанска лига нема да биде дел од актуелната Влада.
„Вратите на срамот никогаш не се затвораат. Тоа е врата на срамот. Низ таа врата Албанската лига и нејзините пратеници нема да влезат. Ние знаеме и да излеземе од тие врати, како што сме покажале и во минатото“, изјави Села.
На конгресот беше усвоена и политичката платформа на Албанската лига, како и повеќе резолуции предложени од партиското раководство.