Бројот на руски хибридни напади врз земјите од НАТО значително се зголеми, наведува висок функционер на Алијансата, пренесува ДПА.
Функционерот на НАТО од Брисел прецизира дека само минатата година се регистрирани повеќе од 200 вакви инциденти, додавајќи дека рутинските „секојдневни“ кибернапади воопшто не се вклучени во оваа бројка.
„Самото седиште на НАТО се соочува со илјадници кибернапади секој месец“, изјави тој, пренесен од германската агенција.
Осврнувајќи се на случајот со дронот полн со експлозив што беше пронајден на аеродромот Лајпциг/Хале во Германија, функционерот нагласи дека видот на откриениот експлозив сугерира директна вмешаност на руската разузнавачка служба:
„Семтекс не е нешто што би му дале на дете што сте го регрутирале да игра видеоигри.“
НАТО, како и германската Влада, овој инцидент го третираат како хибриден напад, иако експлозивната направа не детонирала. Според проценките на Алијансата, Русија преку овие акции се обидува да ја поткопа политичката и практичната поддршка за Украина, но и да се подготви за можна понатамошна ескалација. Ова вклучува извидување на критичната инфраструктура, логистичките синџири и претходно позиционирање на малициозен софтвер во важните индустриски контролни системи.
Од НАТО истакнуваат дека се особено загрижени поради променливата природа на заканите:
„Бројките се зголемени, сериозноста е зголемена, апетитот за ризик е зголемен.“
Како одговор на овие предизвици, Алијансата се стреми да го зајакне одвраќањето преку воени мерки и подобра заштита на критичната инфраструктура. Планирано е и воспоставување на специјална мрежа за критична енергетска инфраструктура која ќе овозможи размена на безбедносни информации со операторите, како и поддршка за заеднички вежби за вонредни ситуации, одбрана од беспилотни летала и киберодбрана. Во особено сериозни случаи, врховниот воен командант на НАТО би можел да побара од земјите-членки и распоредување офанзивни киберкапацитети, додаде функционерот.